సినిమాలో సీన్.. ఇప్పుడు రియల్: సీఎం విజయ్‌కు ఆ నంబర్ ప్లేట్ గిఫ్ట్

తమిళనాడు ముఖ్యమంత్రిగా బాధ్యతలు చేపట్టిన ప్రముఖ నటుడు విజయ్‌ను దర్శకుడు వెంకట్ ప్రభు మర్యాదపూర్వకంగా కలిశారు. ఈ సందర్భంగా 'ది గ్రేటెస్ట్ ఆఫ్ ఆల్ టైమ్' (గోట్) చిత్రంలో విజయ్ పాత్ర నడిపిన కారుకు ఉపయోగించిన 'TN07 CM 2026' అనే ఐకానిక్ నంబర్ ప్లేట్‌ను ఆయనకు బహూకరించారు. ఈ ఘటనతో 2024లో విడుదలైన ఆ చిత్రంలోని ఓ సన్నివేశం మరోసారి వార్తల్లోకి వచ్చింది.

'గోట్' చిత్రంలో విజయ్ 'TN07 CM 2026' నంబర్ ప్లేట్ ఉన్న కారులో కనిపిస్తారు. అప్పట్లో ఈ సన్నివేశంపై పెద్దగా చర్చ జరగకపోయినా, విజయ్ రాజకీయ రంగ ప్రవేశం చేసి, ముఖ్యమంత్రి కావడంతో ఇప్పుడు ఈ నంబర్ ప్లేట్ ఒక జోస్యంలా మారిపోయింది. 2026లో విజయ్ సీఎం అవుతారని సినిమా ముందే చెప్పిందంటూ సోషల్ మీడియాలో నెటిజన్లు పెద్ద ఎత్తున చర్చించుకుంటున్నారు.  

సీఎం విజయ్‌తో భేటీ అయిన ఫొటోలను వెంకట్ ప్రభు 'ఎక్స్‌'లో పంచుకున్నారు. "ఒక చరిత్ర సృష్టించబడింది. ఒక ఆలోచన నుంచి దృశ్యంగా మారి ఈ క్షణం వరకు వచ్చింది. మా గౌరవనీయ ముఖ్యమంత్రి విజయ్‌ను కలిసి 'గోట్' తొలి ఆవిష్కరణను అందించడం సంతోషంగా ఉంది. ఇది ఆరంభం మాత్రమే" అని ఆయన తన పోస్టులో పేర్కొన్నారు.

విజయ్ తన రాజకీయ ప్రణాళికలపై ఊహాగానాలు పెరుగుతున్న సమయంలో ఫిబ్రవరి 2024లో 'తమిళగ వెట్రి కళగం' (టీవీకే) పార్టీని ప్రారంభించిన విషయం తెలిసిందే. ఆ తర్వాత కొద్ది నెలలకే 'గోట్' చిత్రం విడుదలైంది. ఇటీవలి ఎన్నికల్లో ఘన విజయం సాధించి, మే 10న చెన్నైలోని నెహ్రూ ఇండోర్ స్టేడియంలో విజయ్ ముఖ్యమంత్రిగా ప్రమాణ స్వీకారం చేశారు. ఈ రాజకీయ పరిణామాల నేపథ్యంలో సినిమాలోని ఆ సన్నివేశం ప్రస్తుతం వైరల్‌గా మారింది.

ఇదిలా ఉంటే.. నటుడిగా విజయ్ చివరి చిత్రంగా భావిస్తున్న 'జన నాయగన్' విడుదల తేదీ ఇంకా ఖరారు కాలేదు. అయితే, ఈ సినిమాను ఆగస్టులో విడుదల చేసే అవకాశం ఉందని ప్రచారం జరుగుతోంది. పూర్తిస్థాయి రాజకీయాల్లోకి ప్రవేశించడంతో విజయ్ నటనకు వీడ్కోలు పలికిన సంగతి విదితమే.